中環出更：黃帆風街市格價掃靚牛
通脹猛於虎，名人使錢，都要慳住荷包。前博愛主席黃帆風除咗生意數口精，仲係格價專家。經過佢精明格價，發現牛頭角街市嘅牛，比港島區街市平一截。為食正嘢，梗係要行多幾步。
卓妮早前晏晝路經牛頭角街市，撞正黃生單拖買餸。見佢一身街坊裝，喺牛肉檔前左揀右揀，仲落手摸吓牛肉夠唔夠新鮮同彈手。咁認真，原來喺度揀緊牛。
拿手煮滷水煲咖喱
黃生話自己最拿手煮滷水牛，用來當小食佐酒一流，或煮一煲咖喱牛，惹味到極。肉檔上嘅牛咁新鮮，佢二話不說叫老闆留起兩條，盛惠一百五十元。黃生好似執到金咁開心，笑言呢舊牛喺屋企附近嘅港島區街市買的話，起碼貴幾十元，果然精打細算。
通脹來勢洶洶，佢都話感同身受。但平日工作忙，買餸由家傭負責，但工人愛一次過買幾餐餸，唔夠新鮮。想食好嘢，都係要自己出馬喎。近半年，牛肉價格急漲一倍有多，相比之下，喺佢寫字樓附近嘅牛頭角街市買餸，幫佢慳番唔少喎。