中環出更：政商名人再撐日料理
日本地震引起輻射危機之後，飲食界立法會議員張宇人多次帶隊大擦日本菜，尋晚又號召一眾高官及議員到銅鑼灣嘅日本人俱樂部，齊撐由佢發起嘅「愛．日本料理」主辦嘅嘗味晚宴。眾人盡情享用日本空運到港嘅魚生、和牛及蔬果，食得好滋味。
IQ博士有意外收穫
尋晚現身撐場嘅政商界名人逼到現場水洩不通，放膽前來擦一餐。鍾意飲茅台酒嘅立法會議員黃宜弘話，佢年輕時喺美國讀書，就愛上食日本魚生，尤其是海膽。尋晚主辦單位專程為今次活動空運一批北海道海膽到港，IQ博士唔只有口福，仲有個意外收穫，就係畀佢搵到一本教人如何配搭日本清酒嘅手冊，兼且識咗一位日本菜專家，以後想知食乜菜配乜清酒，打個電話就得，茅台缺貨都唔怕喇！
漁農界立法會議員黃容根都食得好開心，佢由八十年代開始就鍾情日本菜，又話日本近排流行用石斑做刺身，同中國人蒸熟嘅食法好唔同。現身撐場嘅議員仲有方剛、林健鋒、劉秀成等。旅發局主席田北俊都喺度，佢為咗撐場都食咗好多唔應該食嘅嘢，包括和牛及炸蝦，點解唔應該食？咪膽固醇過高囉！
商務及經濟發展局副局長蘇錦樑及常任秘書長黃灝玄亦現身打氣，兩人都曾經畀人傳過話會接任局長，少不了被追問，不過兩人一聽到問題就彈開。
張宇人話，本港大部分日本食肆已脫離險境，只差高檔日本食肆嘅晚市仲未全面復甦，遲啲政府將會推出低息貸款幫助日本食肆走出困境。「愛．日本料理」聯席主席黃傑龍就建議，政府應補貼日本食肆業者水、電及牌照費用。
卓妮