自從吳老「鐵三角」選特首論出爐後，估「誰是特首」嘅遊戲愈嚟愈刺激，好鬼好玩。
夕陽政府管治無能，留下的肯定唔係「一份心意」，而係「下屆特首的負擔」。這個充滿「深層次矛盾」的燙手山芋，有能者之中，誰會願意伸出雙手接過？
選特首亦各花入各眼。就像古人評北宋詩人林逋的詠梅詩，歐陽修最欣賞的是「疏影橫斜水清淺，暗香浮動月黃昏」。黃庭堅卻認為林逋另一詠梅句更佳：「雪後園林才半樹，水邊籬落忽橫枝。」獨愛「忽橫枝」，並說不明白何以歐陽修不愛後一句而愛前句，自忖大概文人的作品亦如女人的容貌，「好惡止繫於人」，此亦各花入各眼而已。
吳老的「特首鐵三角」，果然係「試金石」：范太依然內斂，一句「愧不敢當」，有四両撥千斤之勢，沉腰紮馬好功架；唐唐有自知之明，潛變「我是一隻小小鳥」，避談選特首事；阿哈！還是振英哥來個坦蕩蕩，振臂一呼「當仁不讓」，淨係呢份赤裸坦蕩，阿爺理應加佢三十分打底！
老朽雖然讀書少，但知「仁」是儒家思想的本源。孔子經常修訂對仁的看法，譬如「巧言令色，鮮矣仁。」「人而不仁，如禮何？人而不仁，如樂何？」「苟志於仁矣，無惡也。」一個人能「當仁不讓」，老朽深信佢即使吹着口哨撩女仔，也不會心懷不軌。所以話當你改變不了環境，但可以改變自己，改變不了事實，但可以改變態度，心態最終決定你所處的高度。咁有仁心，祝福你！