政情：林瑞麟家族膽固醇多
政制及內地事務局局長林瑞麟早前入院「通波仔」，喺床上都接受記者訪問，休息一晚後更即時復工。林瑞麟尋日出席電台節目時就話，自己當日唔係「畀人擔入院嗰種」，而係好「穩定」咁入院，所以翌日復工冇乜大不了。佢咁講，當堂有意無意咁寸爆前年去完美國返港後，因心臟病發而要即時「擔入醫院」做手術嘅財政司司長曾俊華。
林瑞麟又自爆，佢嘅兄弟姐妹嘅膽固醇積聚都算多，相信佢今次血管閉塞可能同家族基因有關。佢塞血管之時，正正有議員動議取消政制局開支，係咪因為咁而搞到佢愈諗愈谷血呢？佢就話，過去十年八年，年年立法會都會夠票「處理」有關撥款，佢從冇擔心唔通過喎。
政制局副局長黃靜文尋日單刀赴會，勇闖《城市論壇》討論立法會遞補空缺制度，表現都頗為勇猛，唔知其他高官會唔會效法佢，多啲出席論壇同市民現場對話呢？