政情:白富鴻區選撼白鴿

菁英會明日就會舉行換屆選舉,如無意外會由常務副主席洪為民(Witman)坐正主席一職,本身係燕之家老闆嘅現任主席白富鴻卸任後打算年底參選區議會,選區都已經諗好喺中西區區議會嘅衞城選區,對手會係現任區議員、民主黨鄭麗琼。

呢頭卸任,白富鴻最近做咗中西區半山社區事務促進會主席,本月廿八日正式就職,仲喺西摩道一帶掛晒宣傳街板,為區議會選舉做好準備。佢前日同Witman及全國青聯副主席陳仲尼(Rock)去沙田睇跑馬,兩位好兄弟都話全力支持白富鴻參與地區工作,認為政界要年輕化。

中西區衞城選區一直都係白鴿黨嘅地頭,要搶攻唔係咁容易。白富鴻就話,呢個世界冇容易嘅嘢,因為冇難度就冇挑戰,冇挑戰就冇火花,冇火花就冇意義,所以佢會當地區工作係一個新考驗。

Money18免費即秒股票報價網站現推出8升級功能,財經資訊,實時實發!