煲呔曾日前約咗民建聯新一屆領導層去佢間粉嶺別墅玩ＢＢＱ，事後仲將當日活動照貼上特首辦個facebook官方群組「上亞厘畢道」，煲呔曾一向出名親疏有別，咁做本來冇乜問題，不過佢幕後班蠶蟲師爺竟然將煲呔曾一張「Chok爆扮龍友」相貼出嚟，引來網友向佢連環開火狂插。
好似網友Nicko Leung就話：「高高在山上，用幾靚幾長嘅鏡頭都睇唔到民意」、Tang Ray批評：「隻眼開隻眼閉？可能兩眼都緊閉，乜都唔理冇眼睇」，而Roy Lam仲風趣：「果然係『聾』友，對市民嘅訴求永遠聽唔到！」由於揶揄到批評實在太多，呢度不能盡錄。
喺官方群組畀人狂插唔算最好笑，近日竟然有網友喺facebook開咗個叫做「惡搞上亞厘畢道」嘅群組，除咗轉載官方照片外，最抵死係自行加咗一啲圖片說明，總之就充滿創意，令人捧腹大笑。煲呔曾施政乏善可陳，今次激發網友創意，可能係佢任內嘅一項貢獻。