政情：鄉局理順僭建無彎轉
新界村屋僭建風暴鬧得興合合，喺呢個風雨飄搖時刻，處境最尷尬者莫過於一直努力同政府談判、但無辜受盡千夫所指嘅新界鄉議局村屋僭建問題理順小組。有鄉議局中人透露，其實發展局去年已經允許理順村屋天台嘅玻璃屋（第四層），只係受村屋問題影響嘅市民數以萬計，其中難免會有人要求「理順」埋第五、六層或更高嘅僭建物，結果拖到申訴專員公署爆大鑊，搞到依家無彎轉，現階段要理順，都唔知由邊度理起。
消息人士透露，○七年發展局成立之初、林鄭月娥坐正局長之時，鄉議局已經開始同林鄭商討點樣理順村屋僭建物，過去幾年進展唔錯，傾到去年更開始有啲眉目，有傳發展局已經答應容許村屋保留天台搭建物，例如玻璃屋或加建嘅第四層，只要通過合資格人士證明結構安全就可以，搭建物繳交差餉或地租，就容許繼續存在。
陷拉鋸局面 政府避風頭
呢個方案本來已經得到鄉議局及大部分鄉委會嘅認同，可惜仍然有人堅拒收貨，希望理順小組爭取「理順」埋第五、六層或更高嘅僭建物，而且態度堅決、寸步不讓。政府就基於安全理由，加上讓步難以向公眾交代，所以一直唔肯妥協，結果傾來傾去都係得個吉。喺另一邊廂，支持方案嘅鄉紳又不滿小組為何不盡快拍板。就喺呢個拉緊鋸嘅當兒，就殺出個申訴專員報告，將第四層都踢冧埋。
沙田鄉委會主席莫錦貴今年一月去信要求鄉議局，話即使理順小組同發展局傾緊，地政總署同屋宇署仍然不斷警告、甚至檢控違規僭建嘅村屋業主，沙田就有唔少鄉民收到警告信，甚至被釘契，為免鄉民繼續畀人告，莫錦貴要求鄉議局盡快同政府達成共識。
自申訴專員突然將村屋僭建問題無限擴大後，政府礙於輿論壓力，暫時未有再同鄉議局繼續討論村屋僭建理順問題，令件事處於膠着狀態。有鄉議局中人擔心，如果政府會將以前一切討論推倒重來，甚至彈弓手將原本已經打算容許嘅第四層搭建物亦一併取締，理順小組過去幾年嘅努力就會付諸流水，屆時就真係竹籃打水一場空喇。