中環出更：肥亨勸愛女唔好選傑青

認為仲有進步空間

尋日馬時亨出席傑青接受提名嘅記招，呼籲大家做伯樂，提名身邊嘅青年。為公平計，肥亨講明唔會做提名人，但就醒咗評審貼士畀大家，佢話評分首先要睇候選人喺自己嘅工作領域嘅傑出成就，同埋有無做公益回饋社會。

卓妮問佢露明、即係肥亨嘅長女有無機會當選，佢竟然問：「邊個係露明呀？」好明顯無將自己個女同傑青聯想埋一齊。後來佢就話，就算有人提名露明，佢都會勸個女唔好，因為認為佢有大把進步空間，如果勸退無效，佢自己會避席，又話︰「唔好搞到老竇咁尷尬啦！好多人都傑出過我個女。」

露明○九年創立德育學校JEMS，向小朋友灌輸道德教育兼且專教人點回饋社會，近年亦喺唔少慈善活動見到佢蹤影，以咁嘅背景，要選傑青都合晒資格喇。