中環出更：莎姐遊美洲陶醉歷史名城
做人最開心就係有自由、有健康、仲有個愛人陪你周遊列國，拖住手享受人生。自由黨副主席周梁淑怡（莎姐）早前孖老公遊美洲幾個地方，一共玩咗三個半星期，畀墨西哥同德州嘅文化攝住，叉足電先返嚟。
莎姐外甥女前排于歸，莎姐專程同老公周明權一齊過羅省見證溫馨一刻，之後兩公婆再同喺澳洲過去嘅親友，去咗溫哥華、德州同墨西哥等多個地方。莎姐熱愛歷史同文化，今次第一次踏足墨西哥，令佢喜出望外，尤其是充滿咗西班牙特色嘅古城Taxco，呢度曾經係西班牙殖民地，處處可見充滿西班牙特色風格嘅舊建築，就連教堂，亦因為唔同時代建築，而有唔同嘅特色風格。加上本土人後代為咗脫離西班牙，銳意發展本土文化，令到呢個地方充滿獨特色彩。咁多嘢睇，難怪莎姐喺墨西哥留夠六日先捨得走啦。
墨西哥警車長駐 遊得放心
卓妮聽人講墨西哥治安一般，莎姐到訪嗰陣，見到街頭巷尾都有警車停泊，原來為咗搞好旅遊業，呢度對遊客嘅安全好注重，所以有警車長期駐守，令佢哋覺得好安全。
至於德州嘅Fort Worth，亦都好值得遊覽，呢度係上世紀嘅美國牛隻交易中心，擁有牛仔文化同歷史，為咗保持呢個咁珍貴嘅文化遺產，好多具歷史性嘅建築物都獲得好好保存，成個地方似足西部片嘅場景咁，仲不時有牛仔們馴牛比賽，喺當地一個有兩千多個座位嘅表演場上舉行添。
莎姐唔再做立法會議員，呢幾年都去過好多地方遊覽，不過今次美洲之旅，似乎令佢特別開心喎。
卓妮