港府高官冇瓣掂，至叻係齋噏當秘笈，信口開河，語無倫次，九唔搭八。正所謂，山中竹筍，嘴尖皮厚腹中空，完全冇料到。
呢嗱，又有現場示範喇，今次出場嘅係運輸及房屋局副局長邱誠武。當局無情白事喺預算案提出增加私家車首次登記稅百分之十五，惹嚟全城聲討。邱誠武尋日出嚟解畫兼死撐，結果開口夾着脷，愈描愈黑不特止，仲衰多二錢重。
有人建議寬減環保車徵收首次登記稅及對舊車換新車提供優惠，你估邱誠武點講？佢話喎，環保車亦有碳排放，咁做對控制車輛有反效果，仲話加稅會減慢市民換新車令空氣污染加劇嘅講法唔科學，又強調加稅係為咗減少汽車數量。
咁就奇嘞，三歲細路都知環保車可以減少排放，各地政府都積極引入環保車，邱誠武將環保車與傳統車輛同等看待，係咪話路面愈多環保車，污染就會愈嚴重？係咪話各家自掃門前雪，運輸及房屋局淨係負責解決交通擠塞，減少排放就留番畀環境局去搞？
唉，掠水都要搵個企得住腳、令人信服嘅理由至得㗎。邱誠武不如同環境局局長邱騰華拍檔，一個加首次登記稅，一個開首次排放稅，既可以刮多啲民脂民膏，更可以將新車趕盡殺絕，咁咪掂囉！
查實，增加私家車首次登記稅根本冇對症下藥。係人都知，造成本港烏煙瘴氣嘅「元兇」之一係巴士等大型車輛，邱誠武自己都承認，曾收到市民投訴指巴士站過密。目前大部分巴士係排放量較大嘅歐盟二期、三期，頻密埋站不知排出幾多廢氣，當局逼巴士公司升級換代毫無寸進，淨係識向私家車主開刀，簡直豈有此理。
再講吖，靠減少私家車數量紓緩塞車根本係自欺欺人。呢，港府○三年加車稅之後，私家車數目照樣年年增加，反而迫使唔少人轉買二手車或繼續使用性能較差嘅舊車，結果廢氣更多，你話係咪攞嚟搞吖！
仲有吖，過去九年本港私家車每日行車里數不升反跌，反而巴士同的士嘅里數就不斷增加，由此可見，空氣質素惡化，根本同私家車冇關。唔怪得立法會議員質疑當局同中產人士過唔去。
計功夫茶話齋，既然當局將私家車視作洪水猛獸，要去之而後快，不如以身作則，由問責高官做起，即時放棄座駕，住得近嘅行路返工，住得遠嘅搭巴士坐港鐵。話時話，高官放棄座駕，有唔少好處㗎，一嚟可以運動，有益健康，唔使一個二個輪住病；二嚟可以為納稅人慳錢，家陣汽油咁貴，一年慳慳埋埋都唔少㗎；三嚟亦可以減少中環一帶交通擠塞，一舉數得，利己惠民，何樂而不為？齋噏無謂，坐言起行啦！