煲呔曾在立法會答問大會上，指摘部分政黨及政客借環保及保育之名，利用法律程序，為求一己的政治目的，阻撓大型基建上馬，逾七十項工程因而受影響，經濟損失難以估計。哈哈！煲呔曾發炮，有幾時瞄得準目標？一味火遮眼，睇唔到自己嘅過失，內外失序，政府本身環評做得不妥善，輸了官司又有何可怨？
政客無良，政府無能，香港只好沉淪！正如歌仔所唱：「有些事情你現在不必問，有些人你永遠不必等。」煲呔曾同佢嘅團隊解說棘手政策，只能是高薪厚酬嘅「人肉錄音機」，你幾時聽過有思想頂尖嘅高官講過令你眼前一亮嘅嘢？你幾時見過有特立獨行嘅問責局長？
煲呔曾一開口又夾着脷，人家贏了官司，作為特首又豈可形容為「濫用司法程式」？難怪學者炮轟佢除咗講嘢唔經大腦，更反映佢對法治嘅認識好膚淺，亦唔尊重法治。若然，香港嘅核心價值又再隨風而逝。夕陽政府，晚景亦可謂坎坷矣。
老朽一介草民，對法治的認識很膚淺，不過，老朽都知這些年來，內地老百姓患上了秩序焦慮症，很大程度上就是司法不公引起的。有人說，法官也許偶爾會作出政治選擇，但人們仍然希望司法永遠是「靜水深流」式的機關，只有那樣，它才能得到應有的尊重，權力之間的平衡才能得到保障。
事實上，人與人難免意見不同，有衝突，就需要協調，即古人所說的「和」，法律——尤其是司法，就是「和」的一種手段，通過化解糾紛，恢復正義。