警方前日決定唔起訴外號「維園阿哥」嘅人民力量成員任亮憲，低調咗一排嘅佢立即故態復萌，聲言要進行大報復，向喺佢保釋受調查期間攻擊過佢嘅人採取行動，又話會重新考慮參選年底嘅區議會選舉。佢班網上粉絲歡喜若狂，洗版留言助興，有啲仲圍鬧案件女事主Ａ小姐，部分用詞相當不堪。
不過，亦有粉絲指出，雖然任亮憲今次逃過被起訴嘅厄運，但喺政治上始終係一個污點，建議任亮憲今後低調啲。有粉絲更寄語出名多女友嘅任亮憲，以後唔好再咁「為食」，以免再招麻煩，影響整個人民力量嘅發展同選情。
任亮憲會唔會戒「為食」，大家可以放長雙眼睇吓，但想佢低調就似乎冇乜可能喇！佢前日已事先張揚，會喺今日重返佢嘅發迹地《城市論壇》，而且今日嘅論壇主題係立法會辭職遞補機制，主講嘉賓仲包括另外兩位惹火尤物，人民力量幫主黃毓民同民建聯副主席劉江華，估計肯定又會火花四濺。