近期因僭建問題而被揶揄為「僭建聯」嘅民建聯，新任領導層約三十人尋日拉大隊入去特首嘅粉嶺別墅燒嘢食，民記可能畀人鬧得僭建多，佢哋入到別墅都不忘睇吓周圍有冇僭建物，但只係發現僭建咗個臨時帳篷畀大家燒嘢食時遮陰。記得去年民記入去燒嘢食，熱到飛起，雖然今年天氣冇咁熱，但煲呔曾都令民記一眾新成員唔多好受。
話說以主席譚耀宗為首嘅高層介紹新領導層成員畀煲呔曾認識時，據講煲呔曾兜口兜面話好多都唔認得，即係唔識人咁解，搞到啲新人好冇癮，佢仲話政圈內經常鬧佢嘅人就會清楚記得。佢咁講，證明無人鬧佢就唔安樂。
尋日大家燒嘢食之餘，主要係風花雪月，大家仲無聊到講起附近嘅高爾夫球場，煲呔曾話以前經常有高球跌入別墅內，搞到佢要幫手執波，後來啲樹木長大咗，就幫手擋咁啲波。粉嶺別墅作為特區政府嘅後欄，如果經常被高球入侵，等於後欄受襲，都咪話唔影響風水，難怪政府行衰運，乜嘢政策出台都唔得靈囉！