政情：自由黨落戶吸鄉事票
自由黨○八年立法會直選一鋪清袋，蟄伏一排，該黨近期連環喺大埔同上水開設辦事處，下星期更會喺將軍澳以「自由之友」名義開辦事處，用意明顯。雖然榮譽主席田北俊話未決定係咪捲土重來出選新界東，但睇尋日該黨上水辦事處開幕嘅陣勢，就知田少做晒工夫，事關獲鄉議局多位鄉紳撐場。
尋日開幕禮除咗政制及內地事務局局長林瑞麟現身外，一班來自新界北區嘅鄉委會代表都有撐場打氣，仲有○八年立法會選舉後同該黨擘面退黨嘅鄉議局主席劉皇發，所以話呢個世界係冇永遠嘅敵人。早前已有傳田少積極同鄉事派修好，希望鄉事票繼續支持佢，尋日咁多鄉紳撐場，證明箍煲行動相當成功。
身為黨員嘅上水鄉委會主席侯志強形容，北區鄉事派同自由黨關係就好似初相識咁，依家先約會吓，睇吓會唔會有進一步發展；佢又不諱言，北區其他鄉委會對自由黨都好支持，所以現身撐場。至於田少用乜嘢方法箍煲冧掂班鄉紳，咁就佢哋先至知喇！