政情：丁新豹倡中史教育國民
博古通今嘅前香港歷史博物館館長丁新豹，對歷史嘅認知絕對唔講得笑，對於現時有聲音話要搞好國民教育，佢就覺得只要讀好中史咁就搞掂，因為中史可以令學生更加認識自己嘅國家，亦會更了解中國人過去所受過嘅苦難係點樣發生。不過，丁新豹坦言，中史呢個學科唔係咁易讀喎。
最近政府有意喺小一至中六設立必修德育及國民教育科，德育及國民教育專責委員會仲建議出年九月先在全港小學推行，到二○一三年九月再擴大到全港中學，結果惹來好多反對聲音，唔知政府事前有冇諮詢吓丁新豹嘅意見呢？如果佢套理論可行，只要強化中史學科，咁就毋須推國民教育「洗腦」喇。
海防博物館日前舉行「天國春秋——太平天國文物」展覽開幕禮，丁新豹都有出席，佢話太平天國影響深遠，天王洪秀全事迹亦影響唔少革命先鋒，但佢熱愛和平，所以自言同革命大纜都扯唔埋喎。