中環出更:潘潔心火盛 囂張談僭建

新界村屋僭建風暴愈吹愈烈,就連立法會議員同政府高官都牽扯其中,好似環境局副局長潘潔,就被揭發其位於大埔嘅豪華村屋非法僭建,雖然佢已經知衰,即時補鑊搵工人搭棚拆走僭建物,但為時已晚,令香港喺國際都會蒙羞。不過,潘潔似乎未受僭建醜聞困擾,尋日帶住家傭到街市買餸,仲好囂張回應其寓所清拆僭建嘅進展。

卓妮尋日喺大埔鄉事會街大埔墟市政街市遇到潘潔,見佢同家傭買咗啲紅蘿蔔同瘦肉,好明顯就係想煲靚湯降吓火啦。不過,潘潔個家傭除咗孭住個環保袋外,手上仲拎住一袋二袋以膠袋盛載嘅餸菜,睇落相當唔環保。咦?潘潔作為環境局副局長,應該響應政府呼籲少用膠袋,做乜冇叫家傭帶多個環保袋去買餸呢?莫非佢忙於清拆僭建而唔記得咗?

「咁你係唔係想幫手拆吖」

可能靚湯水未落肚,所以潘潔心火特別盛,事關卓妮只係想關心吓佢搞掂屋企嘅僭建物未啫,佢竟然好寸嘴話:「咁你係唔係想幫手拆吖?」講完之後仲好得戚咁笑住行去露天停車場攞車離開。卓妮又唔係專業人士,想幫手清拆都唔得啦,咁又難怪佢咁講嘅,事關幫佢拆僭建嘅工人都冇戴安全帶同安全帽,毫無安全意識,難怪佢隨便問卓妮係咪幫手拆僭建,不如叫埋佢老闆邱騰華幫手拆啦!

Money18免費即秒股票報價網站現推出8升級功能,財經資訊,實時實發!