鄉議局副主席林偉強近日因為該局新大樓工程甩漏問題而成為眾矢之的，鄉議局換屆在即，唔滿意佢表現嘅鄉紳更加乘機借勢攻擊佢，仲計劃搵人挑戰小強嘅副主席個位。早前曾傳出新任坪洲鄉委會主席黃漢權及荃灣鄉委會主席鍾偉平有意挑戰小強，但按目前嘅最新形勢，黃漢權已決定放棄參選，改為全力支持鍾偉平撼低小強。
鄉議局消息人士話，目前小強最少有十七票喺手，同鍾偉平旗鼓相當，所以形勢只係五五波，選情充滿變數。據悉，黃漢權之所以放棄參選，可能知道自己未必撼得贏小強，與其分散票源，不如全力支持鍾偉平，以增加勝算。至於早前傳出有意挑戰另一副主席張學明嘅沙田鄉委會主席莫錦貴，亦都打消參選念頭，全力支持學明競逐連任。
講開又講，新任十八鄉鄉委會主席梁福元自動成為元朗區議會當然議員，佢原本個民選區議員議席懸空而要補選，提名日期結束後接獲兩個提名，分別係事務律師沈豪傑及商人鄭延平。據聞沈豪傑係十八鄉鄉委會法律顧問，而鄭延平就有鄉事背景，今次選舉精彩可期。