政情：范太撐小班教學好處多
香港教育學院尋日搞咗個大中華地區小班教學會議，擔任主禮嘉賓嘅全國人大常委范徐麗泰致辭時透露，佢一向贊同小班教學理念，可以令老師有更多時間關顧學生嘅需要，幫助到學生嘅全人發展，仲透露其兒子范駿華當年都係受惠於國際學校嘅小班教學。
范太話，當年駿華原本就讀一間名校小學，班內四十幾個男生，個個坐唔定，為咗維持秩序，上課時難免有好多規矩。雖然駿華成績相當好，但修讀心理學嘅范太就發現兒子行為有啲異常，心知不妙，於是即時幫兒子轉去讀國際學校，該校實施小班教學，結果讀得好開心，最終學業有成。
范太好感慨話，老師對學生好重要，一言一行亦影響學生發展，佢仲以自己做例子，佢以前有時對老公發脾氣，起初覺得冇乜嘢，點知後來有次同駿華激辯，駿華竟然轉身入房仲大力閂埋門。事後范太獲老公提醒，兒子呢啲行為可能都係學佢，呢件事令到范太明白身教嘅重要性。