政情：大狀黨被嘲亂撞黨
特區政府輸咗港珠澳大橋環評報告單官司，煲呔曾前日就喺立法會答問大會上發爛渣，叫市民深思政黨、政客借環保之名，用法律程序阻撓基建發展，矛頭直指盛傳喺官司背後發功嘅「大狀黨」公民黨。建制派保皇心切，喺尋日立法會內務委員會特別會議上連消帶打，製造機會畀政府反擊，仲喪鬧「大狀黨」變「亂撞黨」，意旨做嘢亂咁嚟，令現場火花四濺。
為政府策動反攻嘅民建聯主席譚耀宗，先開政務司司長唐英年玩笑，話唐唐好擔心港珠澳大橋變咗「珠澳大橋，條條Fing」，仲質問究竟係咪好似公民黨黨魁梁家傑（袋巾傑）前日所言，政府曾收過要為環評做基線評估嘅提醒呢？或者會唔會人哋提醒政府，政府自己無心裝載呀？否則人哋唔會屈你喎！
唐唐好肯定話，相信尊貴嘅立法會議員唔會屈人，但翻查過「白紙黑字」紀錄，政府的確無收過有關意見，可能大家記憶有偏差啦，佢仲補多句話唔知畀意見嘅人，係咪同政府一樣備齊紀錄呢？明顯要摑大狀黨一巴。袋巾傑見狀死撐，強調環評條例立咗法十幾年，政府不知做過幾多次基線評估，但唐唐則指袋巾傑理解錯誤。
民記似乎意猶未盡，由副主席兼行政會議成員劉江華乘勝狙擊，指摘袋巾傑用大狀口脗盤問唐唐，仲話袋巾傑嘅黨友湯家驊喺僭建問題上連判詞都記錯，身為大狀得咁嘅水準實屬可惜，真係大狀黨變「亂撞黨」。前日為寓所僭建道歉嘅湯家驊，即時將罪名攬上身，大呼自己做錯，唔關黨友事。到咗呢刻，民記見政府反擊取得小勝，於是鳴金收兵，呢場大龍鳳於是落幕。
建制派翻箱倒籠尋「謊言」
不過，聽聞建制派唔會就此罷休，有人講明會要求立法會翻箱倒籠，睇吓政府究竟有冇收過袋巾傑所講嘅意見提醒，怕且大狀黨要諗定有乜嘢解釋。雖然民記因為有多名黨員違規僭建而被揶揄為「僭建黨」，但湯家驊單僭建風波，過程中又死撐又道歉，為民記提供反攻嘅彈藥，經此一役，公民黨真係要好好反省吓喇！