中環出更：乒乓孖寶輸波贏牌隊啤酒
為香港攞咗○四年雅典奧運乒乓球男雙亞軍嘅「乒乓孖寶」李靜同高禮澤，一直都係大家心目中嘅傑出運動員，但原來佢哋當年為咗輸波耿耿於懷，尋日孖寶出席龍傳基金《傑出華人講座系列》，同二百個青少年分享佢哋輸波嘅經歷，發人深省。
李靜九○年加入國家隊，兩年後就喺全國錦標賽贏咗男單亞軍，○四年佢夥拍高禮澤贏得香港喺奧運會首面男雙亞軍，返到香港受到全城恭賀。運動員最講求體育精神，能夠入到三甲，孖寶坦言好開心，但畢竟係輸波，所以賽後佢哋都飲咗罐啤酒輕鬆吓。
講開又講，李靜出名鬼馬，佢笑言自己好小器，為咗鼓勵阿澤，有次喺比賽上，當阿澤一失球，佢就會「睥」實對方，結果搞到阿澤愈打就愈差，最後畀教練發現咗佢呢個策略，即刻叫佢唔好再咁做喎。
媽打食李靜波餅
當日孖寶除咗同青年人分享經驗外，仲同大家打咗場友誼波，李靜嘅橫拍太勁，一個唔小心，個波就猛烈錫咗主禮嘉賓媽打李麗娟一啖，但媽打一啲都無嬲，為咗今次嘅講座，媽打足足安排咗兩年，今次畀波省中，絕對係同大家「打成一片」呀！