立法會議員李慧琼尋日喺立法會提出質詢，追問港珠澳大橋環評報告被法院推翻，對沙中線工程嘅影響。由於兩項工程都係運輸項目，政府安排咗運輸及房屋局局長鄭汝樺（Eva）作答。不過班議員問吓問吓，又要求港府交代埋仲有幾多基建工程被迫叫停，搞到Eva口啞啞，坦言「呢個問題最好叫環境局局長答」。喺議員再三追逼下，佢最終承認有多達七十多項工程受影響，但詳細情況就只能稍後以書面補充。
其實尋日立法會嘅第一條質詢，正正係由環境局局長邱騰華作答，之後就到港珠澳大橋環評問題。不過邱騰華明知後者涉及佢嘅政策範疇，甚至主要係因為佢做漏招而起，佢都冇主動留低幫Eva解圍，一答完自己條問題就快閃走人。
有人懷疑邱騰華走得咁急，係同佢嘅副手、環境局副局長潘潔被揭違規僭建有關，擔心自己留多幾分鐘，都可能畀議員或傳媒搵到位留難佢。邱騰華鍾意自己攞彩做騷，啲豬頭骨就留畀下屬啃，喺副局政助圈子早已出晒名。依家副手有難，佢一句口都冇幫過，其他局長同事代佢孭鑊亦唔識幫拖，真係勁冇風度同縮骨。