政情：阿涂做老竇唔選區會？
立法會議員涂謹申尋日證實，佢老婆已經懷孕三個幾月，認真可喜可賀！涂太嘅預產期係今年十一月，咁啱撞正區議會選舉，令一直考慮緊係咪出選嘅阿涂相當頭痕，到底參選好定係照顧剛出世嘅小朋友好呢？
阿涂話，佢老婆個胎只得三個幾月，暫時未知係仔定女，但佢話生仔或生女都咁開心。阿涂今年四十八歲，太太年紀亦唔係十八、廿二，今次太太成功懷孕，兩夫婦都好感恩。佢仲話，佢同太太搬入新居只係半年，啱啱裝修好咋，但為咗小朋友，相信都要花一筆再裝修過。
雖然就快做人爸爸，但阿涂似乎唔知點準備，暫時只係訂咗私家醫院產房位，就連請陪月要提早預約都唔知，睇嚟佢仲有排學。
問到佢太太預產期會同區議會選舉撞期，阿涂坦言現時又多樣考慮，所以仲未知係咪參選。