政情:新界西議員禍不單行

香港政壇近日刮起僭建風暴,多名鄉事派要員、立法會議員、區議員,以至政府高官,都先後被揭發其住所或辦事處有僭建或霸佔官地問題,部分更加要立即拆卸。不過,唔知係咪純粹巧合,多名肇事立法會議員都係來自新界西選區,包括民建聯張學明、街工梁耀忠及工聯會王國興。最邪嘅係,一項喺僭建風暴爆發前進行嘅民調,亦顯示多名新西議員民望齊聲暴跌,真係禍不單行。

香港研究協會尋日發表立法會議員民望調查,新界東同九龍東合共十一名議員,民望相對兩個月前一律有升冇跌。香港島同九龍西亦係升多跌少,十一名議員有八人民望上升,僅三人微跌。唯獨喺新界西就剛好相反,八名議員當中僅得兩人民望上升,六人下跌,其中五人跌幅更相當顯著。

張學明得分包尾

除咗先後爆出僭建醜聞嘅張學明、梁耀忠同王國興,因為有多名黨員被揭違規僭建而畀人笑稱做「僭建聯」嘅民建聯主席譚耀宗,仲有民主黨主席何俊仁同職工盟李卓人,亦難逃民望下跌嘅厄運。其中最先被揭僭建、身兼鄉議局副主席嘅張學明,民望更跌至不合格水平,喺新西八名議員當中包尾。

不過,有關調查係喺本月三至十二日進行嘅,當時梁耀忠同王國興都未被揭發涉嫌僭建,張學明單嘢亦喺十一日先至曝光,影響應該唔會咁快浮現,除非啲受訪者可以預知三人遲啲會爆出僭建醜聞啦!其中梁耀忠、王國興同李卓人,都係形象草根或擁有工會背景,似係受到最低工資實施引發嘅爭議影響。

無論點都好,如果議員繼續知法犯法,唔從速認衰清拆有關僭建物,佢哋嘅民望只會不斷沉底,影響嚟緊嘅區議會同立法會選舉,因小失大。

Money18免費即秒股票報價網站現推出8升級功能,財經資訊,實時實發!