中環出更：仁愛堂豪請學生闖北極
仁愛堂董事局尋日設宴介紹全年大型籌款節目巡禮，去年仁愛堂搞咗團盛大嘅南極考察之旅，反應熱烈，所以新聞處處長黃偉綸一到場，就講笑問吓仁愛堂副主席黃達東（Dennis），今年係咪去北極？點知Dennis諗都唔諗就回答話︰「係！」搞到開口中嘅黃偉綸都忍唔住笑。明日六合彩頭獎多寶獎金高達一億元，係咪應該問黃處長攞番幾個冧巴呢？
陳鄭玉而體能差唔參加
講番去年南極之旅，仁愛堂招呼咗十五位學生參與考察，今年名額將增至二十個，埋單計數要幾百萬元，但為咗向學生推廣環保意識，所以好值得。不過，去極地考察，有錢之餘仲要有假期及良好體能配合，所以唔係個個總理可以隨行。副主席陳鄭玉而就話，佢丈夫同十五歲女兒去年都有參加南極考察團，但佢就冇參加，因為擔心個人體力難以應付旅程。
副主席史顏景蓮就話，佢要問吓已經大學畢業嘅囡囡有無興趣去北極睇吓。史家有女初長成，史太話好多長輩都叫囡囡參加港姐，佢自己都持開放態度，因為覺得參選過程都係一種學習經歷，可惜囡囡無興趣喎。
卓妮