膠得交關，今鋪真係膠得交關！環境局局長邱騰華話喎，膠袋徵費計劃非常成功，所以打算玩鋪勁嘅，一於擴大膠袋徵費計劃，之不過咁，以後膠袋稅毋須上繳。
又要收稅，又免上繳，大家係咪覺得一頭霧水呢？冇錯嘞，呢家嘢正正係本港特產膠人膠事，膠袋明明係軟膠，結果搞到變硬膠。如果大家真係唔明發生乜事，不如等功夫茶簡單介紹一下。
局長大人邱騰華表示，膠袋徵費計劃自從○九年七月實施以來，得到市民同商戶支持，顯著成果包括超過三千家商戶嘅膠袋用量勁減九成，由六億個減至一億個。至於未納入規管範圍嘅商戶，膠袋用量上升百分之六。有見及此，環保署推出擴大膠袋徵費計劃公眾諮詢三個月，將全港超過六萬個零售點納入規管範圍。
邱局長話鋒一轉，即刻擺出一副先天下之憂而憂嘅表情，認為全港有九成商戶屬於小型店舖，如果要求收取膠袋稅之後再上繳政府，未必能夠容易應付，而政府亦都要面對更大量嘅行政工作。為咗一家便宜兩家着，膠袋稅就毋須上繳嘞，商戶可以袋袋平安。
呢嗱嗱嗱，係咪膠得交關呢？膠袋稅用意本來係寓禁於徵，你每個抽稅五毫，小市民可免則免，從而達到減少膠袋損害地球嘅目的。你家陣放任自流，唔使商戶將稅款上繳，一來涉嫌官商勾結，二來咯喎，試問商戶有冇咁乖仔幫你寓禁於徵？萬一商戶利用「免收膠袋稅」作為促銷大計，成個計劃容乜易壽終正寢！
難怪環保人士質疑邱騰華本末倒置：「做到唔湯唔水，咁樣自廢監察武功不如唔做好過。」立法會議員都話有保留，環境事務委員會委員葉偉明認為政府應該收取徵費，方便監察並且推行其他環保措施。另一委員李永達擔心，政府人手不足以監察店舖有否徵費，最終只可以間中抽查或倚靠商戶自律，擴大計劃嘅效用成疑。
講來講去又係邱氏騰華嘅膠官作風累街坊，膠袋徵費計劃九成九爛尾。所謂膠官作風，意思係話荒腔走板，好似話停車熄匙害到司機猝死然後左豁免右豁免，好似話侵佔郊野公園用作垃圾堆填區跟住一嘢被立法會否決，又好似話懶理空氣污染監測標準落後國際幾十年。環保政策幾時做過一齣好戲？今次仲窩囊到棄收膠袋稅，同扯白旗投降冇乜分別。
環保搞到唔湯又唔水，不如咁嘞，搵個黑色膠袋由頭到腳笠住邱局長，免得眼冤！