政情：田定先講明唔捐關愛基金
政府好艱難得到立法會撥款五十億元畀關愛基金，令基金唔使爛尾收場，但當局嚟緊就要繼續向商界乞錢乞夠五十億元。
其實政府籌錢難係可以理解嘅，好似本地慈善家田家炳一手創立嘅田家炳基金會，一向樂善好施，除咗香港之外，喺內地都有唔少慈善項目，但田家炳嘅公子田定先尋日就表明，基金會無意捐款畀關愛基金，點解呢？
內地更需要幫助
田定先解釋，田家炳基金會個荷包其實唔算好大，而且一向都只着重教育方面，佢唔知其他善長仁翁點睇關愛基金，但佢自己就覺得其實香港社會總算富裕，相比之下，內地需要幫助嘅人多好多，基金會有見及此，喺內地三十三個省市都有慈善項目，中小學，甚至綜合大學都有捐錢。
仁愛堂田家炳小學早排是非纏身，好似有教職員涉及風化案、有學生公開試出貓、學校招標又出現問題，校長鄔淑賢就話，事後已經進行一連串改革，相信將來唔會再有類似情況發生。
同場嘅田定先亦話，太陽之下無新事，世事無完美，輸咗唔緊要，只要唔好輸埋個教訓就可以喇。