政情：鄉局大樓手工差鄉紳火滾
耗資一億八千萬元嘅沙田石門鄉議局新大樓外觀宏偉，兼夾古色古香，從外面睇工程都搞到七七八八，但尋日喺鄉議局執委會上，有鄉紳就大彈新大樓手工差，又話工程有延誤，搞到開幕典禮都要推遲舉行，言談間極度不滿負責新大樓工程嘅副主席林偉強，場面都幾火爆㗎！
有鄉議局中人話，有關新大樓嘅工程及費用問題，理應先由林偉強領導嘅「鄉議局新大樓建築工程專責委員會」處理咗先，再交執委會表決通過，但有人成日唔開會，次次掟筆數上執委會就話要班鄉紳通過，最慘係新大樓內部裝修某啲地方手工認真差，結果搞到大家條氣好唔順。
發叔避嫌唔參與
鄉議局主席劉皇發尋日承認，新大樓內部某啲地方嘅質料同手工都有問題，其中以簷篷為甚，落雨都唔知點算。發叔仲話，某啲執委的確好唔滿意，但為咗避嫌，佢一向唔參與工程及費用，所以今次仍然會留畀專責委員會處理番喎。鄉議局下月初換屆，按目前形勢，睇嚟林偉強連任真係危危乎。