政情：政府陰招護林D9推防「公投」機制
上周五咁啱撞正十三日，即西方俗稱嘅「黑色星期五」，唔少人都估計政府又會重施故技，喺當日推出大堆不受市民歡迎嘅政策，博傳媒分身不暇，報道唔到咁多衰嘢，變相沖淡部分負面消息，點知港府呢招陰濕招數推遲到尋日施展。至於今次港府公布一大堆政策係為咗掩護邊個？最可疑就係政制及內地事務局局長林瑞麟（林D9）負責嘅防止「公投」機制。
政府選擇喺尋日發布嘅重要新聞，數埋最少有半打，其中發展局公布研究發展岩洞同喺維港以外地方填海，以及市區重建局公布馬頭圍道春田街重建項目收購呎價，本質尚算中性，唔算乜嘢負面新聞。至於鄉議局大會討論村屋僭建風暴，同埋勞工及福利局向立法會交代最低工資實施嘅情況，雖然係有少少負面，但亦未至於要動用整部政府機器去沖淡掩護。
至於環境局公布擴大膠袋稅徵收範圍，市民將來幾乎喺所有商舖買嘢，都要畀五毫子先攞到一個膠袋，肯定又會激起民憤同滋生種種執行問題。不過，有關消息早喺幾日前曝光，社會某程度已經消化咗，照計亦毋須搞咁多嘢遮遮掩掩，剩番就以防「公投」機制最可疑。
鬼祟公布 玩謝傳媒
綜觀上述六單政府政策新聞，發展局、市建區、鄉議局及勞福局嘅會議，都早喺前日就預先通知傳媒，膠袋稅問題亦係事先張揚，大家都預咗會喺尋日公布，唯獨係防「公投」機制，就喺尋日下午先通知傳媒，林D9仲要揀正喺五點鐘見記者，撞正市建局記者會兼遲過其他四單新聞，令傳媒機構難以即時調動人手採訪、搵政黨回應同預留篇幅報道，非常陰濕！
雖然大部分市民都唔認同立法會議員亂咁辭職、浪費公帑強推「變相公投」，但依家林D9建議嘅自動遞補方案，不但隨時面臨司法覆核挑戰，仲可能會令啲支持度極低同醜聞纏身嘅落選候選人，毋須再次經過選舉洗禮就自動遞補為議員，剝奪選民嘅投票權，肯定又會掀起連串法律同政治爭議。所以港府咁鬼祟推出有關建議係可以理解嘅！