中環出更：邱達宏樂做「Zegna Man」
現時一套質料上乘嘅西裝起碼要過萬元，但一眾成功男士為咗着得有型靚仔，所以絕對唔慳得。同樣係成功男士嘅工業總會行政總裁邱達宏（Dennis），就最愛意大利Ermenegildo Zegna西裝。Zegna西裝以利落剪裁、優雅線條見稱，據聞英國查理斯王子都係忠實擁躉。
Dennis身高六呎，標準模特兒身材，佢一面自豪話：「我着五十二號Zegna西裝，唔使改，好fit！」Dennis同Zegna結緣，始於三十幾年前，當時佢任職貿易發展局，被派駐米蘭，偶爾路經一間售賣西裝面料嘅小店，於是買布訂造人生首套Zegna西裝。
其後，小店躍身為國際名牌，喺全球八十多個國家開設零售店，Dennis亦幫襯至今，早前佢出席工總活動時，就以一套深灰色Zegna西裝亮相，連恤衫都着埋同一牌子，名副其實係「Zegna Man」。Dennis每次去意大利公幹，都會搵相熟舖頭入貨，職員會打個小折頭，服務仲特別貼心添！