好咯好咯，深圳警方終於做番一齣好戲，經過連月部署之後，日前瓦解廣東省最大六合彩報走私集團，檢獲三萬幾份彩報，以及幾千份《蘋果日報》馬經，集團主腦夫婦一網成擒。你知啦，內地彩毒真係害人不淺㗎，病態賭徒家破人亡不知凡幾，其中一個罪魁禍首就係由香港走私北上嘅六合彩報，家陣瓦解一個犯罪組織，起碼叫做稍為撥亂反正。
走私集團嘅賊頭係一對夫婦，兩個人嘅成魔之路係咁嘅，姓劉嘅男魔頭原本務農，後來被招攬去搬運六合彩報，當佢發覺走私利潤可觀，咁就決定另起爐灶嘞，搵埋老婆夾手夾腳食大茶飯。兩公婆勾結香港不法分子，由香港同黨準備港產彩報，然後偷運入境，銷往深圳、廣州、東莞、河源、汕頭等地。聽講話喎，今次檢獲嘅三份港產彩報《六合皇》、《貼士皇》同《創富》更加係佢哋兩公婆「獨家代理」。
呢嗱嗱嗱，講開呢三份播種賭禍嘅港產彩報，不得不提一筆爛帳。有名你叫淫賤黎嘅黎智英確係見錢開眼，《六合皇》、《貼士皇》同《創富》三份彩報曾由淫賤黎旗下公司為承印人。所以話啫，淫賤黎唔止反中亂港，簡直禍國殃民！
好嘞，深圳警方瓦解廣東省最大六合彩報走私集團，係咪話表示彩毒從此絕迹呢？如果你係咁諗，未免過於天真。舉個例吖，內地公安經常都話大舉掃黃，你幾時見過嫖客搵唔到花姑娘？即係咁，野火燒不盡，春風吹又生，一次半次嘅執法行動只不過係杯水車薪，如果內地警方唔打算長期作戰，非法六合彩仍然係會荼毒百姓㗎！
好似呢一對墮落夫婦咁吖，搵銀嘅首要條件係勾結香港不法分子，假如香港警方坐視不理，一雞死一雞鳴嘅啫。歸根究柢內地病態賭徒需要嘅係港產彩報，你一日唔去徹底堵塞走私漏洞，犯罪分子始終都會有人取代被瓦解嘅走私集團。
唉，講到尾都係官匪勾結，而且不排除跨境勾結。喂，港產六合彩報長期好似冇掩雞籠咁走私北上，遍地開花賣到成行成市，你話冇幕後黑手貪污腐敗包庇放縱，講都冇人信啦！
就以重災區深圳為例吖，寶安區前一排被揭發有市場公然出現「六合彩報走廊」，十幾檔小販眾目睽睽出售非法彩報，市場人員又唔去管理，政府部門又唔去執法，你話係咪官匪勾結吖？
計功夫茶話齋，瓦解一個六合彩報走私集團係唔夠嘅，必須全力以赴撲滅賭禍，包括中港合作截斷六合彩報走私路線，否則彩毒春風吹又生，隨時國破家亡㗎！