政情：沈祖堯圓滑網誌教學生
最低工資條例實施，香港中文大學校園飯堂承辦商同員工重新簽訂僱傭合約，一班一向激進嘅中大學生哥好緊張班工友嘅福利問題，佢哋仲喺校園飯堂拉起橫額，話要幫班工友爭取有薪飯鐘同休息日。不過，校長沈祖堯就喺網誌提醒班學生哥，為工友爭取有薪用膳時間同休息日，可能會令承辦商因為經營困難而加價。即係話，到時同學仔就要食得鹹魚抵得渴，唔好呢頭拉橫額為工友爭取有薪飯鐘錢同休息日，嗰頭又拉橫額抗議飯堂加價。
最低工資都要校長插手，原因一定係佢擔心班學生激進起上嚟乜都冇得傾，所以盡早曉以大義，以免大家硬晒軚。中大前任校長劉遵義同學生關係奇劣，仲畀學生起晒花名，沈校長可能見前車可鑑，上任以來用不同渠道同學生保持住溝通，喺呢篇網誌裏面，佢行文圓滑，讚學生見義勇為、為基層員工發聲，好開心見到同學仔咁積極參與喎。而校方都願意行多一步，適度下調行政管理費。