政情：洪為民擁三碩士學位
香港菁英會常務副主席洪為民（Witman）最近喜上眉梢，事關佢用咗兩年半時間苦讀中國人民大學法律碩士學位，上周五親自北上為畢業論文答辯，幾經辛苦終於獲得五位教授全數通過，成為佢第三個碩士學位。Witman話，佢正考慮繼續讀法律博士，一於貫徹終身學習嘅精神，不愧係年輕人嘅模範。
Witman之前已經取得中文大學歷史系文學碩士、英國赫爾大學（University of Hull）工商管理碩士。佢為咗更深入了解國情，加上自己對歷史情有獨鍾，所以○八年決定再修讀人民大學法律碩士，畢業論文題目係「論儒家思想對中國古代物權制度嘅影響」。
Witman好開心，話遲啲會搵班菁英會嘅兄弟慶祝。今個月廿四日菁英會就嚟改選，Witman係接下會長火棒嘅熱門人選，今次雙喜臨門，佢梗要請食飯喇！