政情：發叔自由黨重修舊好？
自由黨喺上屆立法會直選鎩羽而歸，副主席「莎姐」周梁淑怡事後更炮轟鄉議局主席劉皇發「對唔住自由黨」，掉轉槍頭幫民建聯張學明拉票，直接促使發叔退黨，轉投同樣由自由黨分裂出嚟嘅經濟動力。「分手」多年，發叔尋日首度出席舊黨友嘅活動，賀該黨位於大埔嘅新東支部開張，莫非已經同自由黨重修舊好？
對於發叔畀面撐場，該黨主席劉健儀話，自由黨同鄉事派關係不嬲都幾好，叫大家唔好咁敏感。黨榮譽主席田北俊就話，今次發帖係以發叔「鄉議局主席」嗰頂帽邀請佢，直言鄉議局喺新東同新西支持者眾多，請對方係有原因。不過發叔只係逗留約半個鐘就匆匆離開，被問到同自由黨嘅關係亦封口唔答。
早前有傳田少為下年出戰新東鋪路，曾向本身亦係自由黨成員嘅上水鄉委會主席侯志強打招呼尋求支持。侯志強尋日亦有撐場，承認同自由黨相處良好之餘，仲好豪氣咁話會過晒啲票畀個黨喎。