政情:許華傑選立會心大心細

立法會將會喺明年改選,不過大部分人都只係將注意力集中喺超級區議會議席同一眾直選議員身上,往往忽略咗重要性相當嘅功能界別議席。好似民建聯進出口界議員黃定光(象哥)咁,如無意外下屆都會退位讓賢,交棒畀新任民建聯中委兼已故立法會議員許長青個仔許華傑。許華傑參選立法會已經係公開的秘密,不過佢早幾日同傳媒聚會時就話自己仲未諗掂,個心仍然十五、十六喎。

許華傑嘅爸爸許長青,之前同樣擔任過進出口界嘅立法會議員,令許華傑喺業界一早就建立咗人脈同知名度,加上呢幾年得到象哥扶掖同提攜,近日又做埋民建聯中委,令到佢喺業界裏面人氣急升,既然象哥萌生退意,由許華傑接棒都係一個幾正路嘅選擇,不過佢本人就話,自己盤生意仲未上軌道、加上仔細老婆嫩,依家都尚且分身不暇,若然做咗立法會議員,私人時間肯定更少,要認真諗諗咁話。

當選應毫無難度

除咗生意同屋企問題外,據許華傑自己講,香港中華出入口商會方面對於由邊個代表業界去做立法會議員仲係懸而未決,林林總總問題令到佢不得不左思右想,認真慘情。依家距離立法會換屆仲有一年,要候選人咁早承認會出嚟選肯定冇可能,只不過功能界別議席選情一向相對較穩定,點都唔會好似許華傑講得咁波譎雲詭。

許華傑得到象哥照顧,加上自己喺業界嘅人脈關係,要當選可以話毫無難度,雖然佢依家仲係猶抱琵琶半遮面,不過所謂人在江湖身不由己,若然形勢比人強的話,到時出唔出選都未必到佢自己話事。

中華出入口商會同內地關係一向唔錯,早一個星期商會原來曾經組團去內地探訪,仲得到國務委員劉延東接見添。據了解,劉延東訓示商會要處理好勞資問題,同埋鼓勵商會支持辦好國民教育、推廣普通話教育咁話。內地依家一切以維穩為先,香港近日實施最低工資搞出好多爭拗,以內地思維模式,呢個肯定唔係好事,難怪領導人會畀呢類指示佢哋啦。

Money18免費即秒股票報價網站現推出8升級功能,財經資訊,實時實發!