中環出更：靚蝦王去新西蘭頤養天年
一代馬王「靚蝦王」唔經唔覺已經十五歲啦，即係等於人類嘅五、六十歲，馬主劉錫康雖然好唔捨得，但都決定送暱稱「蝦仔」嘅愛駒去新西蘭嘅牧場頤養天年。劉錫康話最難忘係十一年前蝦仔代表香港贏得日本安田紀念賽，啟發佢只要有蝦仔咁強嘅鬥心同適應力，凡事都有可能，再難嘅難關都可以過。
劉錫康話當正蝦仔係自己仔女，當然希望仔女可以留喺自己身邊，但知道唔可以咁自私，係時候畀蝦仔去一個更大嘅地方生活，拍拖、結婚同組織新家庭。蝦仔九月就會離開香港，劉錫康話一家人呢幾個月會多啲去探蝦仔，到蝦仔喺新西蘭安頓好，仲諗住飛到當地牧場探蝦仔添。
「靚蝦王」喺九八年三月首次出戰新馬賽已經成為冠軍馬，○○年六月贏出安田紀念賽，更成為首匹勝出海外一級賽事嘅本地賽駒，翌年被評為草地短途世界馬王，三年半競賽生涯贏過十二次冠軍，贏得獎金逾三千七百萬，深受馬迷歡迎。