中環出更：哪吒搞迷你關愛基金
政府搞關愛基金籌款辦事不力，向商界「揼心口」眼高手低，諗住籌五十億點知差咗一大截。其實大有大搞，細有細搞，總之一分耕耘一分收穫。西貢區議員「哪吒」方國珊喺地區搞咗個迷你版本嘅關愛基金，唔聲唔聲已經籌到五百幾萬蚊喺手。
母親節派花拗柴
尋日哪吒撐住拐杖同契媽一齊入馬場，見佢要攞住拐杖，原來喺上個星期日母親節，佢落區派花，點知差錯腳拗柴，依家事隔一星期都仲要撐拐杖，兼要睇跌打同針灸。
哪吒同自由黨榮譽主席田北俊鬧翻，田少講到明話唔會捐錢畀關愛基金，哪吒就明寸田少拒捐關愛基金做法唔好，認為應該呼籲大家都捐錢，好似佢咁窮，都一樣捐咗十萬蚊畀西貢區嘅迷你關愛基金，佢仲話，大孖沙、小孖沙都話唔捐就最曳，真係句句有骨落地。
至於幸福女大班梁高美懿，就同媽咪、老公、兩個寶貝女一齊入馬場，捧佢哋隻「神童」出賽，梁太話，「神童」個名係開過家庭會議後決定改嘅，雖然「神童」尋日無發揮水準，不過佢哋一家四口都係馬主，感覺特別溫馨。