中環出更：澳門銀河開幕盡顯東南亞風情

四太唔怕有競爭

澳門銀河尋日正式開幕之前，已經人山人海喺門外等入場。開幕禮前嘅記者會，銀河娛樂副主席呂耀東（Francis）同爸爸嘉華集團主席呂志和一齊現身，詳細介紹成個度假村嘅設備，包括號稱全球最大嘅空中衝浪池，面積達四千平方米，人造浪最高去到一點五米，仲有用三百五十噸白沙鋪成嘅人造沙灘，面積超過二千平方米。主題好明顯，就係東南亞風情。全部三間酒店，提供房間超過二千二百間。

同行未必如敵國，身為澳博董事嘅賭王四太梁安琪尋日盛裝出席撐行家場，依家喺澳博舉足輕重嘅四太話唔怕有競爭，因為良性競爭係好應該嘅。佢好同意Francis所講，希望港澳可以合作，旅客喺香港玩完，就可以過澳門玩多幾日。

尋日出席開幕式嘅嘉賓多不勝數，中大生物科學院客席教授曹宏威博士同呂志和相識廿幾年，所以同太太拍拖嚟捧場。其他一樣讚不絕口嘅仲有中策集團主席馬時亨同菱電集團主席胡曉明，佢哋兩位都係識享受之人。

身為教徒嘅馬時亨雖然唔賭錢，不過都話遲啲要同太太嚟玩吓。帶埋太太、仔仔一齊到賀嘅胡曉明一向都鍾意去澳門食嘢，今次佢都同老同學Francis合作，喺酒店裏面開咗兩間餐廳。

呂耀東（左）同爸爸呂志和上陣不離父子兵。	渡假城門外，人山人海等開幕。 （袁志豪攝）	四太一身貴氣造型嚟撐場，不失青春氣息。
曹宏威同太太喺池邊享受日光浴。	同老友一齊到賀嘅馬時亨雖然唔賭錢，都話要同太太嚟玩吓。

卓妮