二○一二年雖然未必係電影粉絲深信不疑嘅世界末日，之不過對於特區政府而言，肯定係時辰快到嘅大限臨頭，事關曾蔭權管治班子到咗二○一二年就夠鐘叮一聲落台。既然係咁，你估一眾高官會以乜嘢心態返工呢？都唔使奢望強政勵治、以民為本、急民所急咯，曾班子一定係返工等收工，收工等夠鐘，拍拍屁股即鬆。
喺呢一個咁嘅大環境之下，香港極有可能再多一項爛尾工程，籌劃六年嘅尖沙咀露天廣場計劃隨時胎死腹中。由於曠日持久所以大家唔記得尖沙咀露天廣場計劃到底係乜乜東東芫荽葱？不如溫故知新睇睇背景資料先啦。
○五年喎，政府有意搬遷尖沙咀碼頭巴士總站，打造一個露天廣場，計劃提交立法會討論。為咗隆重其事，政府更加喺○九年聯同建築師學會舉辦尖沙咀露天廣場設計比賽，原訂去年初公布結果。之不過咁，相關工程一提出即刻惹來一連串反對聲音，保育團體強烈反對之餘，仲成立「尖碼之聲」長期抗爭，爭取將尖沙咀碼頭巴士總站納入歷史建築評級。天星小輪同樣反對，擔心搬遷巴士總站影響乘客量。
好嘞，既然工程遇到咁多阻力，而等收工嘅夕陽政府又暮氣沉沉，你估有冇人積極推動工程吖嗱？官方講法係咁嘅，正重新檢討有關計劃，包括考慮大幅縮減工程範圍，甚至考慮是否繼續推展項目。嗱嗱嗱，畫公仔唔使畫出腸，甚至考慮是否繼續推展項目云云，意思心知肚明嘞，尖沙咀露天廣場有機會擱置。大家唔好唔記得喎，尖沙咀露天廣場嘅設計比賽遲遲都未公布結果，搞到建築師學會會長林光祺大表失望，佢批評：「邊有設計比賽兩年幾都冇結果？參賽者畀咗時間金錢做設計，咁樣拖落去對參賽者好唔公平！」
唉，莫講話夕陽政府等收工吖，就算以前未到大限臨頭，爛尾工程都不知凡幾啦。好似香港仔漁人碼頭咁，講來講去講咗十年，忽然之間一嘢擱置。至於嗰一個西九文化區，雖然未算爛尾，不過之前都試過推倒重來啦。其他嗰啲乜乜中心物物港，全部好似八萬五房屋政策一樣，唔提就唔存在o架喇。
即係咁，尖沙咀露天廣場爛尾已經係大勢所趨，鬼叫庸官當道咩。計功夫茶話齋，與其話曾班子係夕陽政府，不如話係爛尾政府。
爛尾政府又獻世，你叫香港市民何來信心明天會更好？不如咁啦，認真考慮提早落台換班，咁先至算做有少少新希望吖嘛！