夕陽政府時日無多，擺明想學老子「無為而治」，是以推政策疏漏百出，最低工資如是，關愛基金如是，醫護流失創新高——冇挽留。危樹隨時冧——話之你。對正義傳媒司法不公——側側膊。然老子「無為」並非厭世，否則佢老人家唔需要寫下五千言《道德經》。
煲呔曾可能只知「無為」而不知「無為」底下還有「無不為」三個字。母親節煲呔曾憶起兒時，眾兄弟合力買「燒鵝髀」給母親，令到母親淚流披面！老朽想問一句，佢及其團隊治港咁多年，有冇合力送隻沙薑雞腳給老百姓？如果有，百姓在佢榮休前，即使「淚在心中流」，激動的脈搏相信佢都會聽到。
民生多艱，「無為」也要「無不為」！最近，有內地學者指香港的競爭力雖在兩岸四地仍然排第一，但在經濟規模、效率及產業層次三方面已淪為阿二，分別被北京及上海等內地城市超越；又指本港發展創新科技多年，人才其實相當充足，但科技成果卻未能令人滿意，促政府要主動出擊。
大家睇到政府高官五勞七傷，想搵個接班人都難。鬼咩！擴大政治問責並非「選賢與能」；政府用人連五代十國的馮道——「事四朝，相六帝」的「奸臣之尤」也不及，皆因馮道任宰相後，「凡孤寒士子、抱才業、素知識者」只要有真才實學、有事業心的人，不論貧窮、背景，都得到提拔重用。相反，即使家世顯貴，然品行不正、辦事浮躁的人也會被抑制或冷遇。
可見，在用人方面，特區政府不及馮道。