政情：胡掃紀念郵票送禮
今個月廿九日就係香港總商會一百五十歲生日，連串嘅慶祝活動將達到最高潮。本月底總商會將喺會展席開一百五十圍，大開派對賀生日。尋日香港郵政宣布推出一套「香港總商會成立一百五十周年」紀念郵票及相關集郵品，本月廿六日開始發售，首日封就率先於今日有得賣。咁有紀念價值嘅郵品，連總商會主席胡定旭都話要掃定幾十套，送畀至親老友。
肥胡話，總商會係香港歷史最悠久嘅商會，一百五十周年的確唔容易，所以佢主張求變。佢舉例話，以前總商會撐政府撐到十足十，但係依家要實事求是，好似最近工商界齊聲反對嘅競爭法，政策唔啱就要出聲。
講到連串慶祝活動，肥胡話，五月廿七日將喺會展開派對慶祝，到時精彩節目包保令賓客盡興，不過佢唔肯透露細節，話要保持神秘喎。至於五月廿六日開始發售嘅紀念郵票，佢實要掃定貨送贈畀至親老友喇！