政情：挺范唐梁組鐵三角
「老愛國」前港區人大代表吳康民早前獲國務院總理溫家寶單獨接見，席間兩人更談及康叔寫嘅文章《誰能維穩，便是「真命天子」》，令下屆特首選舉呢個議題再被炒熱。康叔尋日再下一城，喺報章撰文力撐人大常委范徐麗泰做特首，仲將現時最熱門嘅候選人政務司司長唐英年同梁振英（CY）扯埋一起，建議唐唐捱義氣連任多屆，CY則取代曾俊華出任財政司司長，冀三人可合組一個強勢領導鐵三角咁話。文章一出，政圈中人無不嘩然，各黨都質疑將三名特首競爭對手擺埋一齊，隨時火星撞地球，難怪康叔都自嘲呢番係忽發奇想嘅「遊戲文章」啦。
康叔喺嗰篇題為《2012來個「鐵三角」又如何？》嘅文章上，力撐啱啱話要「玩多兩個月」嘅范太坐上特首寶座，話佢有民望，同各方面都冇牙齒印，相信由佢出任，反對聲音唔會太大。康叔又話，前後做咗十年司長嘅唐唐同公務員團隊磨合較佳，建議佢「屈就」做多屆司長；至於近年動作多多嘅CY，康叔就認為佢有抱負，對經濟問題又有研究，大可先做一屆財政司司長先「更上一層樓」。
政圈中人質疑成效
康叔直言，范太身體唔好，可以只做一屆特首；而唐唐同CY就仲後生，認為二人大可透過未來五年嘅磨練，好好將自己嘅缺點克服，五年後強勢上台都未遲。佢接受訪問時仲話：「三人都有意思出選，與其三人爭到頭崩額裂，不如大家合作搞一個好嘅組合啦。」
康叔喺政圈地位超然，但佢呢番想法卻得唔到各黨認同。民主黨張文光認為「鐵三角」三人性格、作風同派系都唔同，夾硬炒埋一碟不但達唔到康叔成日掛喺口邊嘅「維穩」目標，更令政府運作增加爭拗。
同樣被視為特首黑馬人選嘅新民黨主席葉劉淑儀坦言，「鐵三角」三人本為競爭對手，過往又冇合作歷史，要結成一個團隊並唔容易，覺得呢個組合太理想化。被形容為唐唐「家臣」嘅工業界林大輝亦覺得呢番言論只係康叔個人意見，唔涉及中央意旨，仲話「鐵三角」合作機會唔高喎。我哋問過「鐵三角」三人嘅回應，三個人都好「齊心」全部決定唔回應。
其實康叔自己亦承認，要范、唐、梁三人合作絕不容易，「出嚟選嘅人，當然要做一哥。我呢啲遊戲文章，冇咩根據，有根據就唔會咁寫法啦！可能只係我一廂情願㗎啫！」「鐵三角」能否成事有待觀察，但隨着特首選舉逼近，「真命天子」好快會揭盅。