中環出更：黃永光低調行善探長者
咪以為信和集團執行董事黃永光（Daryl）含着金鎖匙出世，不知人間疾苦，其實呢位奉行低調嘅信和太子爺，經常落區去探訪長者同埋基層兒童，又放下身段為食物銀行寫字樓翻新油漆，親民作風認真抵讚。
最近信和集團出咗份最新刊物《Sino CSR》，記載一班管理層及員工善盡社會責任嘅足迹。喺創刊號上，一張張Daryl落區探訪嘅相片最令人難忘。佢一時去黃大仙東頭邨探訪獨居長者，為佢哋更換慳電膽，又送上福袋；一時去大角咀，同三十幾位本地及南亞裔基層兒童開派對。其中有一張相係Daryl戴上白色手套，蹲下為牆身翻新髹油。原來信和贊助旗下位於油塘嘅物業，畀非牟利嘅食物銀行作為貨倉及寫字樓，信和義工隊「信和友心人」成員，亦都去幫手翻新，Daryl係義工隊成員，二話不說捲起衫袖做埋一份。
Daryl話，經過呢啲義工活動之後，佢希望員工可以更積極參與志願服務，然後感染身邊更多人投入義務工作。