含辛茹苦獨力湊大囡囡嘅新民黨主席葉劉淑儀，喺日前嘅母親節收到意外驚喜，佢囡囡Cynthia越洋訂咗一籃包上朱古力嘅士多啤梨送畀佢，最攞命嘅係上面綁住個寫上「I Love You」嘅氣球。話就話越洋，實情係Cynthia打長途電話返香港，再碌番葉太張卡買禮物畀媽咪，不過點都好，心意大於一切啦。
葉太收到呢份禮物嘅時候不知幾開心，連個氣球都擺喺屋企留念，佢話後來先知道身在美國嘅囡囡，專登打咗幾次長途電話返香港落訂，訂咗之後仲不斷跟進葉太收唔收到。雖然份禮物最終都係葉太自費，不過Cynthia咁有心，難怪葉太拎住份禮物影咁多相擺喺facebook晒幸福啦。
講起士多啤梨，原來葉太每朝早餐都會食，佢習慣食混合脫脂奶同生果嘅穀物片，而士多啤梨含豐富維他命Ｃ，兼且有抗癌作用。佢話早餐邊使食燕窩呢啲咁名貴嘅嘢喎，最緊要係食得健康至真。