民政事務局局長曾德成近日成為眾矢之的，由東亞運混帳醜聞、關愛基金爛尾、以及國民教育洗腦等，統統關佢事。社民連立法會議員長毛梁國雄尋日喺立法會威脅要向佢掟棺材，不過就唔關上述三件事，而係講緊香港嘅露宿者問題。
立法會福利事務委員會尋日討論露宿者問題，社會福利署同醫院管理局都有派人出席，但唔見同樣有關嘅民政事務局官員，引起長毛不滿，質疑德成局長掛住搞東亞運同關愛基金，當啲露宿者、關注團體同福利委員會冇到：「曾德成應該嚟又唔嚟，我今日原本整咗副棺材掟佢，但佢無嚟，我下次就要掟佢！」不過記者睇勻都唔見長毛身上有類似棺材物體，唔知佢係收得密定吹水。
長毛又話，德成局長擅自將過千萬元東亞運盈餘捐咗出去，其實只要將呢筆錢用嚟喺露宿者身上，佢哋嘅生活已能大為改善：「依家（全港）露宿者有一千人，一人一萬蚊咪又係一千萬，曾德成要搵的五無人士就喺晒呢度！」
