政情：洪為民餵鄭重科飲奶
香港菁英會常務副主席洪為民（Witman），同香港青年聯會副主席鄭重科（Tony）老友鬼鬼，原來兩人識於微時。Witman結婚時，Tony仲係兄弟團成員添！早前兩人憶起當年嘅搞笑趣事，簡直笑爆肚。
早前呢兩位沙煲兄弟喺菁英會嘅活動上碰頭，Tony故作神秘咁話，佢同Witman關係非淺，全因為Witman，佢先至飲咗人生第一支奶。Witman聽罷哈哈大笑，娓娓道來當年所發生嘅趣事。
Witman話，約廿年前佢結婚當日，Tony係佢嘅兄弟，當日大男人們例牌畀姐妹團玩到盡。記得當時佢要好似餵BB飲奶咁，抱住Tony呢個巨型BB，用奶樽餵佢飲奶，場面十分搞笑。兩人憶起呢段青葱歲月，笑得更加豪邁。人生難逢知己，值得飲多杯喇！