政情：鬍鬚曾赴建制派飯局混吉
立法會建制派議員早前萬不情願咁投票支持「史上最廢」預算案，對嚟緊區議會選舉嘅影響，真係啞子吃黃連，有苦自己知！搞出呢份預算案嘅財政司司長曾俊華，尋晚現身建制派嘅定期飯局，畀面出席嘅議員得廿個左右。有議員私下直言係因為明知鬍鬚曾「廢廢哋」，令唔少人死心杯葛飯局。即使勉為其難出席嘅，亦只係為咗圍剿鬍鬚曾逼佢快啲派六千蚊，同埋要求佢為調高汽車首次登記稅提供豁免等，希望對方會知恩圖報，可惜最終又係期望愈大，失望愈大。
工聯會議員黃國健尋日喺開飯前，已表明會追問鬍鬚曾幾時派錢。民建聯陳克勤亦講到明係為咗加車稅而來。結果個半鐘左右，鬍鬚曾同一眾議員已前後腳鬆人，明顯係話不投機半句多。
有議員爆料，唔少人質問鬍鬚曾幾時派到錢、點樣定義十八歲條界線等，不過佢都講唔出，淨係識得講會喺七月去立法會攞錢。其他議題好似加車稅豁免、置安心可租可買等，佢都係交白卷兼耍太極，話會向相關局長反映，所以餐飯咪罕有地極速食完囉。最後餐飯仲係咁多位議員夾錢埋單，鬍鬚曾兩手空空連禮都唔識做番份，認真冇品。