政情：許曉暉逼做fb論壇箭靶
上年高鐵事件鬧得滿城風雨之際，聲言廣聽民意嘅港府曾「處女下海」，派出運輸及房屋局局長鄭汝樺（Eva鄭）喺社交網站facebook（fb）大搞網上諮詢論壇，可惜最終喺安排不周下，畀千萬網民怒轟冇誠意，唔搞好過搞。事隔一年，港府終於走出陰霾，拍板喺本周五傍晚七時正，於特首辦「上亞厘畢道」fb專頁，再搞番個名為「時事Q&A」嘅官民網上對話，為時四十五分鐘。但唔知係咪見過鬼怕黑，頭炮竟然搵嚟知名度勁低嘅民政事務局副局長許曉暉（Florence）出戰，仲話要同網民探討社企發展喎，齋聽呢個組合經已悶到瞓着！
早喺去年初，當港府仲未有「上亞厘畢道」呢個fb專頁時，運房局曾特意開設一個fb戶口，邀請網民留言，再安排局長Eva鄭直接回應，但呢次網上諮詢卻換來劣評如潮。有人批評當局揀周六朝早搞論壇，令一啲要返工嘅人士無法參與；有人就話當局開設嘅戶口喺論壇完結後就即時收檔，有欠誠意；最搞笑係由於官員以龜速回應相關留言，令網民慨嘆自己似喺度自言自語多啲喎。
悶爆社企發展做議題
不過，曾班子近月施政連番失誤，即使佢哋喺今次網上論壇嘅安排上搞得幾周全，出席嘅問責官員都肯定成為炮灰，親民騷隨時變出醜爛騷。據聞港府原本屬意搵勞工及福利局局長張建宗打頭炮，親自回應坊間對最低工資嘅種種疑問，奈何相關議題近月喺社會嘅爭議愈來愈激，佢哋擔心張建宗最終不敵網民，引火自焚，就扑低咗呢個建議，千揀萬揀下改派Florence出戰。
Florence喺芸芸問責官員中，民望算係唔錯，亦唔似得佢老細民政局局長曾德成咁經常失言，但佢嘅知名度亦相對較低，行出街都唔知有幾多人認得佢，怕且特首辦主任譚志源都係睇中Florence呢個「優點」而搵佢做白老鼠。港府更嚟個「雙重保障」，挑選悶到抽筋兼冇乜爭議嘅社企發展嚟做討論議題，將論壇嘅惹火程度降至冰點。試問若果佢哋係安排曾德成大談東亞運超支，一班網民又點會放過佢？
港府又計劃喺網上諮詢當日，安排主持抽讀網民對社企發展嘅疑問。話到明抽讀，一啲政治不正確嘅提問自然隨時被「河蟹」，熱心網民屆時可能只有留言嘅份兒嘞。港府今次能否吸取經驗，順利搞到一個好過上次嘅網上諮詢，大家不妨拭目以待。