中環出更：梁愛詩逛ＨＭＶ掃人氣影碟
再強嘅女人，都有柔情一面。基本法委員會副主任梁愛詩平日予人Cool爆感覺，私底下，鍾意喺電影世界搵樂趣。閒來無嘢做嘅時候，詩姐愛匿喺屋企「煲碟」。榮獲奧斯卡最佳電影嘅《皇上無話兒》影碟剛出爐，詩姐第一時間去掃碟。
周日母親節，一身黑衫黑褲，拎住Harvey Nichols紙袋嘅詩姐，獨自逛置地。時值晏晝三點半，詩姐休閒地走入HMV。潮流新曲琳琅滿目，但詩姐眼尾都唔望吓，直接行去影碟架，見到期待已久嘅《皇上無話兒》影碟面世，拿拿臨攞住一隻喺手。《皇上無話兒》講述英皇喬治六世如何克服口吃缺點，終於喺二次大戰時發表全國演說，激勵軍心，戲中對白精闢，難怪吸引出名雄辯滔滔嘅詩姐。
睇介紹入晒神
買一隻碟又點夠喉，詩姐左
右，喺一埋舊碟中發現由已故奧斯卡影后伊莉莎伯泰萊主演嘅《巨人》。佢瞇起雙眼細閱影碟背後嘅介紹，顯得好認真，一於扑錘買埋佢。埋單計數，一共花費近二百七十元，可以煲足兩晚，抵到爛！