中環出更：杏林行善樂韻送光明
醫者父母心，杏林界一班名醫，前晚舉辦「杏林樂韻送光明」慈善音樂會。雖然撞正母親節，不過大家為善最樂，醫學會會長蔡堅同皮膚科醫生史泰祖，連幫老婆大人慶祝都要讓路，齊齊撐起音樂會。
城中名醫前晚雲集香港大會堂，出席由香港醫學會慈善基金揸旗嘅慈善音樂騷。當晚收益將撥捐「亮睛工程慈善基金」，為內地貧苦大眾提供免費或低收費白內障手術。身為該基金發起人兼主席嘅眼科名醫林順潮，罕有地帶埋靚靚太太及囡囡亮相。
曾參加選美嘅林太，嫁人後火速誕下兩個囡囡，但身形Fit到極。大女已三歲半，前晚陪爸媽聽音樂會，表現精靈又可愛。
林醫生坦言希望生多幾個，但怕老婆辛苦，會先徵詢太太意願。林醫生又讚老婆賢良淑德，上個月結婚周年紀念，只收一張心意卡已心滿意足。
蔡堅明寸關愛基金
音樂會上，嘉賓滿堂。蔡會長行善亦不忘寸政府，話醫學會作風踏實，籌到百五萬元已經心滿意足，「我哋唔係要籌五十億！」明寸政府成立嘅關愛基金打腫塊面充闊佬，結果爛尾收場，認真幽默。
講番當晚節目，由香港醫學會嘅管弦樂團及合唱團齊演出。卓妮問史泰祖醫生會否粉墨登場，佢謙稱煮飯至係佢專長，自小被爸爸欽點做「火頭大將軍」，練得一手好廚藝。
前晚母親節，本來入廚煮大餐孝敬太太，但為撐老友，欠住太太一餐先。
卓妮