銅鑼灣係內地同胞訪港必到嘅購物「聖地」，尤其係個人遊旅客，無論潮手機、新款電腦定黃金首飾，鍾意就買，見乜掃乜，商戶豬籠入水賺到笑。不過，呢班米飯班主隨時會移情別戀，咁嘅墟冚場面只會喺台北西門町再現。
內地據講最快會喺下月底至七月初實施赴台個人遊，尋日北京高層同台灣政壇重量級人士亦承諾，爭取盡快落實。睇嚟呢單嘢冇十足都有九成九。已經四面楚歌嘅香港旅遊業，睇怕前景凍過水。
本港○三年獲中央打救推出個人遊，八年來經濟上得益唔少。統計顯示，本港近七成旅客來自內地，每年達到二千二百萬人次，仲保持有兩成增長，而個人遊比例更直線上升。如果內地個人遊成功「登陸」寶島，本港首當其衝，客源一定被分薄。
危機殺到，警鐘響起，但有關部門仲盲目樂觀，旅遊發展局高層回應話，香港同台灣旅遊產品唔同，依家評估開放赴台個人遊嘅影響言之過早，仲話相信台灣「未有耐追上」。
講開旅遊產品，功夫茶直頭扯晒火。台灣推廣旅遊產品手法推陳出新，為吸引內地客源不斷開發新景點；香港旅遊設施乏善可陳，景點屈指可數，如果真有唔同，一成不變睇怕就係本港旅遊產品最大特點嘞。
有本港學者發現，目前開放赴港個人遊省市中，有八成旅客曾經來過香港，而台灣對內地旅客有更多「新鮮感」。學者警告港府，要盡快解決低接待團費問題同加速旅遊推廣轉型。立法會議員王國興亦指出，內地旅客第日多咗選擇，一定唔會揀香港。佢更狂炳港府旅遊政策不思進取，大安旨意「食老本」。
冇錯嘞，就算係鮑參翅肚，餐餐食都厭啦，更何況本港得Ｎ年不變嘅幾個景點。再講，內地人普遍有台灣情意結，發夢都掛住阿里山、日月潭，加上同聲同氣，香港點夠揮呀？
仲有吖，由於港府監管不力，本港旅遊業近年「劏客」醜聞不斷，個朵喺內地已經臭晒，畀着係你，個人遊都會揀台灣喇，講玩講食，去台北士林夜市遍嘗風味小食，總好過嚟香港做水魚畀人掠啩？
逆水行舟，不進則退。中國社會科學院啱啱發布中國城市競爭力藍皮書，香港雖然連續第六年綜合競爭力排第一，但經濟效率方面不如台北，產業層次方面不敵北京，基礎設施方面輸畀上海、廣州，瓣瓣唔掂，旅遊業又點同人哋爭吖？
家陣競爭愈來愈激烈，上海起迪士尼樂園同香港硬撼，海南發展國際旅遊休閒島，擺明同香港爭生意，但港府仲烏吓烏吓，淨係識話無懼競爭。開發新景點不力，連掃除黑店，整頓業界劏客歪風亦唔踢唔郁，計功夫茶話齋，呢場仗未打已經輸硬！